Хөдөө аж ахуйн бирж хил дамнасан арилжаа зохион байгуулна

Эх сурвалж: ХХААХҮЯам

Munkhtuya | 2018.03.30 11:21


“Хөдөө аж ахуйн бирж” ХХК нь хил дамнасан арилжаа хийхээр болсон талаараа өнөөдөр /2018.03.30/ сэтгүүлчдэд мэдээлэл өглөө.

Хөдөө аж ахуйн бирж ХХК-ийн гүйцэтгэх захирал Х.Баатар, “Хил дамнасан арилжаа /board cross trading/ буюу хоёр улсын биржийн хамтарсан арилжаа нь  цахим горимд явагдана. Эхний ээлжинд ноолуур арилжихаар төлөвлөж байна. Өөрөөр хэлбэл, хөдөө аж ахуйн гаралтай бараа, түүхий эдийг БНХАУ болон бусад орны эцсийн хэрэглэгчдэд шууд нийлүүлэх зорилгоор “Бохай” биржтэй хамтран хил дамнасан арилжааг зохион байгуулна” гэдгээ хэвлэлийн хурлын үеэр мэдэгдсэн юм. 

Хэвлэлийн бага хуралд тус биржийн Стратеги, судалгаа хөгжлийн хэлтсийн захирал Ж.Мягмарсүрэн, ерөнхий менежер Б.Чулуунбаатар нар оролцож, сэтгүүлчдэд дэлгэрэнгүй мэдээлэл өгсөн.

           Дэлхийн ноолуурын зах зээлийн түүхий эдийг гол бэлтгэн нийлүүлэгч нь Монгол, БНХАУ, Энэтхэг, Иран, Афганистан, ОХУ зэрэг улсууд байдаг. Манай улсын хувьд 40 орчим хувийг бэлтгэн нийлүүлж байна. Ноолуурын түүхий эдийн үндсэн шинж чанараар Монгол, БНХАУ-ын ноолуур хамгийн сайнд тооцогддог. Тиймээс ч өмнөд хөрштэйгээ ийнхүү хамтран ажиллахаар боллоо.

Засгийн газраас баталсан “Ноолуур” хөтөлбөр нь ноолуурын боловсруулалтын түвшинг дээшлүүлэн, эцсийн бүтээгдэхүүн үйлдвэрлэх, экспортыг нэмэгдүүлэх зорилготой. Хөтөлбөрийн хүрээнд ноолуурын үндэсний үйлдвэрүүдэд хөнгөлөлттэй зээл олгох, технологийн шинэчлэл хийхэд дэмжлэг үзүүлнэ. Энэ чиглэлээр ХХААХҮЯ, Хөгжлийн банк хамтран ажиллах бөгөөд хөтөлбөрийг хэрэгжүүлэхэд Хөдөө аж ахуйн бирж голлох үүрэг гүйцэтгэж байна.

          Дашрамд дурдахад, “Хөдөө аж ахуйн бирж” ХХК нь 2017 онд 163 удаагийн спот, 1 удаагийн форвард гэрээний арилжаа зохион байгуулж, 6,955.7 тонн ноолуур, 10,887.6 тонн хонины ноос, 355.5 тонн тэмээний ноос, 1,674.1 тонн ямааны завод ноос, 1,206.7 тонн хонины завод ноос тус тус арилжжээ.

 


Зохиогчийн эрх ©2019 Хүнс, хөдөө аж ахуй, хөнгөн үйлдвэрийн яам